Arild og Elisabeth Kleppe framfor den siste investeringa: ny Valtra-traktor!
Kaia og Håvard med flaskelam
Ofte vert vegen til medan ein går. Slik vart det for dette paret, som har teke over og slått saman bruka sine, bygd nytt og investert for framtida, og midt oppi det heile fått tre born. Alt dette har dei fått til i løpet av få år! Her snakkar vi om pågangsmot og positivitet! Dette er bønder vi tek av oss hatten for, dette er bønder for framtida!
- Her i området er det fleire som er i investeringsfasen og har bygd nytt fjøs, til liks med oss, som for to år sidan bygde nytt lausdriftsfjøs. Men det er ein evig kamp om leigejorda, kan Arild seie vidare, og fortel korleis det vart heiltidsbonde av han.
- På vidaregåande tok eg skogbruklinja ved Voss Jordbruksskule. Etter militæret jobba eg som avløysar, og fekk tilbod om å forpakte eit bruk. Samtidig var eg avløysar andre stadar, og var også innom Rokne-garden, der ei søt jente budde…
Elisabeth har ein tre år yngre bror som hadde planar om å drive garden. Men då Arild kom inn i biletet vart det aktuelt at odelsjenta Elisabeth likevel skulle ta over og drive heimgarden saman med han, og broren fann seg eit anna yrke.
- Eg sjølv har vakse opp seks kilometer unna, på ein noko brattlend gard med tre kyr og nokre sauer. Sauene har eg teke med meg vidare. Det er bra å drive med litt sau og, i tillegg til storfe, som gjev oss primærinntekta. Sauene held kulturlandskapet så fint ved like, og held oss med kjøt til eige bruk. Det er ikkje fritt for at eit smalahove på ekte Vossa-vis ligg på middagsfatet på Rokne, seier Arild.
Paret overtok bruket på Rokne i 2010 etter Elisabeth sine foreldre. Elisabeth har jobb i barnehage, men både ho og borna er med på stell av dyra og tek del i ulikt arbeid. Interessen er der – kanskje har dei nokon etter seg som seinare vil overta?
- Vi bur i generasjonsbustad i det gamle våningshuset på garden, med Elisabeth sine foreldre i øvste etasjen. Besteforeldra til Elisabeth bur i kårhuset ved sida av, så her er mange for borna å få merksemd frå - og eit godt samarbeid mellom fleire generasjonar. Svigerfar hiv seg ofte i traktoren og tek i eit tak, og vi er fleire om å passe borna.
Arild er ein praktisk kar som trivst godt ute med variert gardsarbeid.
- Ja, sånt innearbeid og papirarbeid er iallfall ikkje noko for meg, det er heilt klart, slår han fast.
- Eg ser særleg stor pris på dei ulike årstidene vi har, sesongane som gjev naturleg variasjon i arbeidet. Stort sett er eg nøgd og trivst i jobben min, kan han seie, og fortel om nytta han har av Agrilogg:
På Rokne har dei nytta seg av det digitale verktøyet Agrilogg i snart tre år no.
- Eg brukar Agrilogg både titt og ofte. Modular som gjødsling, slått og produksjonslager er flittig i bruk. Også leigearbeid. Sidan eg tek på meg oppdrag med rundballepressing og litt køyring av møkk til andre, er det fint og lettvint å kunne registrere det der.
Vi har bygd opp garden vår jamt og trutt sidan vi tok over i 2010, og kjem til å fortsette med det. Agrilogg blir med vidare – det er heilt klart, seier Arild Kleppe, før han tek til med dagens gjeremål.
Storfe i fjøsen
- Eg verdset dei ulike sesongane vi har som gjev naturleg variasjon i gardsarbeidet, seier den fornøgde bonden Arild Kleppe.
